Almal het seker al die dag na strawwe oefening met seer spiere wakker geword en vir ’n oomblik gewonder of die inspanning die pyn werd was. Maar, soos die ou gesegde lui, “Sonder pyn en opoffering kom jy nêrens nie”.

Dis belangrik om te onthou dat nie alle pyn op groei dui nie.

Ongemak weens ’n besering as gevolg van ’n swak gestruktureerde oefenplan is nie die soort pyn wat ons verlang nie. En net soos in die geval van fiksheid kan ’n lukrake benadering van ons finansies minder gewenste resultate tot gevolg hê. Dis waar ’n raadgewer – ’n persoonlike afrigter of ’n finansiële beplanner – talle insigte en leiding kan bied om jou te help om jou doelwitte te bereik. En by SFP het ons al ’n magdom finansiële beserings teëgekom en ons kliënte gehelp om daarvan te herstel en sterker en fikser te wees.

Soortgelyk aan die rol wat ons as finansiële adviseurs speel, stel persoonlike afrigters ’n nommerpas padkaart op wat op jou unieke behoeftes gegrond is. Hulle skep ’n gebalanseerde oefenroetine wat by jou fisiologie pas, verskaf dieet-advies na aanleiding van jou dieetkundige behoeftes, en stel ’n oorkoepelende strategie op om jou te help om jou doelwitte te bereik. Alhoewel dit jou verantwoordelikheid is om by die plan te hou en die nodige ongemak te verduur ten einde te groei, ondersteun hulle jou elke tree van die pad. Kom ons kyk na ’n paar belangrike voordele wat ’n persoonlike afrigter inhou.

Geoptimaliseerde, vinniger resultate

As ons aan onsself oorgelaat word, volg ons dikwels die maklikste weg, en kies ons dalk net 30 minute op die trapmeul. ’n Persoonlike afrigter maak seker dat jou tyd in die gim geoptimaliseer word en lei jou deur die regte oefeninge en die gebruik van die regte toerusting.

Stel van realistiese doelwitte

Die nie-bereiking van ’n fiksheidsteiken kan ontmoedigend en moontlik ’n sielkundige struikelblok op die pad na toekomstige sukses wees. As jy egter doelwitte stel soos om 10 kg binne ’n week te verloor, kan jy verwag om te misluk (of ’n besering op te doen). ’n Persoonlike afrigter help jou om haalbare, volhoubare, gesonde fiksheidsdoelwitte te stel.

Aankweek van blywende gewoontes

Fiksheid moenie ’n item op jou taaklysie wees wat jy een keer per week afmerk nie. ’n Persoonlike afrigter moedig kliënte aan om gesondheid as ’n integrale deel van hul lewens te prioritiseer, en stel ’n oefenroetine op wat in ooreenstemming met hul daaglikse lewens is en deur gesonde gewoontes versterk word.

As finansiële adviseurs sien ons ooreenkomste met die voordele wat ons verskaf. Ons help jou om die regte hulpmiddels te gebruik om jou groei te maksimaliseer (met minder inspanning), wat vinniger, beter resultate verseker. Ons professionele kundigheid maak dit vir ons moontlik om jou te help om realistiese en gesonde finansiële doelwitte te stel.

Net soos fiksheid is finansiële gesondheid ’n lewenslange reis. Die behaling van sukses verg deskundigheid en ’n vaste roetine. Ons is hier om die oormatige aanwending van jou hulpmiddele te verhoed en jou te help om finansieel sterker te word.

Laat ons dus die ongemak aanvaar, en onthou – dis alles deel van groei.