Ons het ’n ruk gelede ’n blog oor batebeskerming gepubliseer. Ná die herstel van talle plaaslike en internasionale gebeurtenisse wat miljoene mense kwesbaar gelaat het as gevolg van swaar verliese, het ons dit goed gedink om weer te kyk na die idees in die blog om jou te help met die inligting wat jy nodig het om jou gesin en jou finansies te beskerm.

Batebeskerming help ons om ons bates wettiglik te beskerm. Voldoende batebeskerming behoort in plek te wees voordat ’n eis of aanspreeklikheid voorkom, aangesien dit te laat is om ná die daad enige beskerming wat die moeite werd is te bewerkstellig. By SFP raai ons kliënte soms aan om te kyk na die opsie om korttermynversekering te gebruik om hul bates te beskerm.

Korttermynversekering kan baie toepasbaar wees omdat dit uitgeneem word vir die tydperk waarvoor jy dit benodig. Hierdie polisse kan gewoonlik enigiets van eiendoms- en huisbewoners- tot reis- en sakeversekering dek.

Wat slim is omtrent korttermynversekering is dat dit in ons voortdurend veranderende behoeftes voorsien. Dis nuttig, omdat die aard van die polis buigsaamheid bied. Dit verskaf dekking sonder om ons tot een lewenstandaard te beperk. Dit stel ons in staat om ons motor te opgradeer of ’n nuwe huis te koop sonder om vir die res van ons lewens versekering op ons ou bates hoef te betaal.

Die premies wat ons betaal, word bereken volgens ons individuele risikoprofiele en die waarde van die bate wat verseker word. Kom ons sê ons verseker byvoorbeeld ’n motor. Ons ouderdom, geslag, bestuursgeskiedenis, die waarde van die motor, die area waar die motor gewoonlik geparkeer word en of ’n diefweertoestel in die motor geïnstalleer is, is almal faktore wat in ag geneem word wanneer die premies bereken word. Ons vorige versekeringsgeskiedenis word ook in aanmerking geneem, en hoe gouer ons dus ’n goeie rekord opbou, hoe beter.

Versekeringspolisse sit sekere risiko’s uiteen wat gedek sal word indien dit eendag plaasvind. In dié geval sal jy gewoonlik ’n bybetaling moet doen (’n voorafbepaalde persentasie van die waarde van die bate, of ’n beperkte bedrag – afhangende van die polis), waarna die versekeraar die res van die eis sal dek. Dis belangrik dat ons bates korrek gewaardeer word omdat die versekeringspolis nie die volle bedrag sal dek as jy onder- of oorverseker is nie.

Versekering kan baie spesifiek wees wat betref dit wat gedek word, en ons moet goed kyk na wat ons verseker en hoe ons ons bates waardeer. Byvoorbeeld, wanneer ons ons huis verseker, is daar oor die algemeen drie soorte versekering.

Gebouversekering dek die fisiese struktuur van jou huis sodat jy gedek is indien herstelwerk nodig is om die huis weer heel te kry. Huisinhoudversekering dek jou toestelle, rekenaars, klere, boeke en meubels. En versekering vir draagbare besittings (soms genoem allesomvattende versekering) dek daardie items wat gewoonlik in jou huis is maar gereeld saam met jou geneem word, soos selfone, skootrekenaars of ontwerpersonbrille.

Versekering kan tegnies raak, maar dit behoort nie angswekkend te wees nie. Per slot van rekening bied dit ons beskerming. As jy van mening is dat jy ekstra beskerming nodig het, kontak ons.